>> 23.57 कोटी रुपये खर्चून जमीन संपादित; मुख्यमंत्र्यांनी मानले उत्तर प्रदेश सरकारचे आभार
राज्य सरकारने अयोध्येत ‘गोवा राम निवासा’साठी सुमारे 23.57 कोटी रुपये खर्चून 3801 चौरस मीटर जमीन संपादित केली आहे, अशी माहिती मुख्यमंत्री डॉ. प्रमोद सावंत यांनी काल दिली.
अयोध्येत श्री राम मंदिराचे उद्घाटन करण्यात आल्यानंतर मुख्यमंत्री डॉ. प्रमोद सावंत यांनी गोव्यातील भक्तगणांच्या सोयीसाठी अयोध्येत गोवा राम निवास उभारण्याची घोषणा केली होती. उत्तरप्रदेश सरकारने जमीन उपलब्ध करून दिल्यास श्रीराम निवास उभारण्यात येईल, असे मुख्यमंत्र्यांनी त्यावेळी स्पष्ट केले होते.
राज्य सरकारने अयोध्येत गोवा राम भक्त निवास बांधण्यासाठी उत्तर प्रदेश सरकारकडे भूखंडासाठी संपर्क साधला होता. उत्तर प्रदेश सरकार आणि उत्तर प्रदेश आवास आणि विकास परिषदेने गोवा राम निवासासाठी अयोध्येत भूखंड उपलब्ध करून दिला आहे. परशुरामभूमी गोवा आणि अयोध्या यांच्यातील आध्यात्मिक बंध मजबूत करण्यासाठी, संपूर्ण भारतात भक्ती, संस्कृती आणि एकता वाढवण्यासाठी हे आणखी एक पाऊल आहे, असेही मुख्यमंत्री म्हणाले.
गोव्यातील श्रीराम भक्तांसाठी अयोध्येत निवासासाठी खास जागेची सुविधा लवकरच उपलब्ध केली जाणार आहे. पंतप्रधान नरेंद्र मोदी यांच्या दूरदर्शी नेतृत्वाखाली, अयोध्येत भव्य श्रीराम मंदिराचे स्वप्न प्रत्यक्षात आले आहे, ज्यामुळे आपला आध्यात्मिक आणि सांस्कृतिक वारसा पुन्हा जागृत झाला आहे, असे मुख्यमंत्र्यांनी म्हटले आहे. या ऐतिहासिक चळवळीशी जुळवून घेत, गोवा राम निवास अयोध्येला येणाऱ्या भाविकांसाठी एक पवित्र आणि खात्रीशीर निवासस्थान प्रदान करेल, असेही मुख्यमंत्र्यांनी म्हटले आहे. जागा उपलब्ध करून दिल्यानंतर मुख्यमंत्र्यांनी उत्तरप्रदेशचे मुख्यमंत्री योगी आदित्यनाथ यांचे आभार मानले आहेत.
