>> नरेंद्र मोदींचा अमेरिका दौरा निष्फळ? दुसऱ्या विमानात 119 भारतीय; गोव्यातील एकाचा समावेश
भारतातून अवैधपणे अमेरिकेत गेलेल्या स्थलांतरितांना पुन्हा मायदेशी पाठविणारे दुसरे विमान आज (शनिवार, दि. 15) अमृतसर विमानतळावर उतरणार आहे. या विमानात 119 भारतीय नागरिक असल्याची माहिती समोर आली आहे. यापैकी 67 प्रवाशी एकट्या पंजाबमधील आहेत. यानंतर तिसरे विमान 16 फेब्रुवारी रोजी येणार आहे. यापूर्वी 5 फेब्रुवारीला अमेरिकन लष्कराचे सी-17 हे विमान 104 भारतीयांना घेऊन अमृतसर विमानतळावर आले होते, त्यामध्ये हरियाणा, गुजरात आणि पंजाबच्या नागरिकांचा अधिक भरणा होता.
पंतप्रधान नरेंद्र मोदी यांनी नुकताच दोन दिवसीय अमेरिका दौरा केला. यावेळी त्यांनी अमेरिकेचे राष्ट्राध्यक्ष डोनाल्ड ट्रम्प यांच्याशी अवैध स्थलांतराच्या मुद्द्यावर चर्चा केली. तसेच दोन्ही नेत्यांच्या भेटीनंतर झालेल्या संयुक्त परिषदेत पंतप्रधान मोदी यांनी या मुद्द्यावर आपली सविस्तर भूमिका मांडली. मात्र मोदींचा हा दौरा अवैध स्थलांतरितांच्या मुद्द्यावर फारसा फलदायी ठरला नाही. मोदींनी ट्रम्प यांच्याशी चर्चा केल्यानंतरही अमेरिकेने आपल्या धोरणात कोणताही बदल केलेला नसून, अमेरिकेत अवैध राहणाऱ्या भारतीयांना मायदेशी पाठवण्याचे सत्र कायम ठेवले आहे.
मिळालेल्या माहितीनुसार, पहिल्या विमानाप्रमाणे दुसऱ्या विमानात भारतीय नागरिकांना बेड्या, साखळ्या घातल्या जाणार नाहीत. पहिल्या विमानातील नागरिकांच्या हातात बेड्या घातल्यामुळे मोदी सरकारवर जोरदार टीका करण्यात आली होती. भारतीयांना गुन्हेगारांप्रमाणे वागणूक दिल्याचा आरोप विरोधकांनी सरकारवर केला होता. लोकसभेत या विषयावरून गदारोळ उडाल्यानंतर परराष्ट्र मंत्री एस. जयशंकर यांनी निवेदन दिले होते. भारतीयांना अमानवीय वागणूक दिल्याचा मुद्दा अमेरिकेसमोर मांडला जाईल, असे आश्वासन त्यांनी दिले होते.
कुठल्या राज्यातील किती नागरिक?
स्थलांतरितांना घेऊन येणारे दुसरे विमान शनिवारी रात्री 10 ते 11 वाजण्याच्या सुमारास अमृतसर आंतरराष्ट्रीय विमानतळावर पोहोचण्याची अपेक्षा आहे. सूत्रांनी दिलेल्या माहितीनुसार, या विमानात पंजाबचे 67, हरियाणाचे 33, गुजरातचे 8, उत्तर प्रदेशचे 3, महाराष्ट्र आणि राजस्थानचे प्रत्येकी 2 आणि गोवा, हिमाचल प्रदेश आणि जम्मू-काश्मीरचा प्रत्येकी एक नागरिक आहे.
