राजधानी पणजीसह सत्तरी, वास्को, मये, आजोशी-मंडूर, फोंडा तालुक्यातील काही भागात अवकाळी पावसाने काल पुन्हा एकदा हजेरी लावली. वादळी वार्‍यामुळे काही ठिकाणी झाडांची पडझड झाली. रेडे घाटी वाळपई येथे मुख्य रस्त्यावर झाड कोसळल्याने वाहतुकीत अडथळा निर्माण झाला होता.
येथील हवामान विभागाने दक्षिण पूर्व अरबी समुद्रातील कमी दाबाच्या पट्टा आणि विदर्भ ते कर्नाटक दरम्यान वाहणार्‍या वार्‍यामुळे १४ व १५ एप्रिल रोजी राज्यातील काही भागात पावसाची शक्यता वर्तविली होती. हवामानातील बदलामुळे राज्यात शुक्रवारपर्यंत ढगाळ वातावरण राहणार आहे. राज्यात जोरदार वारे आणि विजांच्या कडकडाटाची शक्यता हवामान विभागाने व्यक्त केली आहे.
