>> ३ मे रोजी न्यायालय शिक्षा सुनावणार
मेरशी येथील दुहेरी खून प्रकरणानंतर खून करण्यात आलेल्या नायक दाम्पत्याच्या दोन मुलांचे अपहरण, लैंगिक छळ आणि खुनाचा प्रयत्न केल्या प्रकरणी संशयित ओस्बान लुकस फर्नांडिस आणि रमेश बागवे यांना दोषी ठरविले आहे. पणजी येथील बाल न्यायालयाने हा महत्त्वपूर्ण निवाडा दिला असून संशयित आरोपींना ३ मे रोजी शिक्षा ठोठावण्यात येणार आहे.
नायक दाम्पत्याचा मे २०१३ मध्ये खून करण्यात आल्यानंतर त्यांच्या ६ आणि ४ वर्षांच्या दोन मुलांचे अपहरण करून त्यांचा लैंगिक छळ आणि खून करण्याचा प्रयत्न करण्यात आला होता. या दोघा मुलांना अनमोड घाटात निर्जन स्थळी फेकण्यात आले होते. परंतु, सुदैवाने दोन्ही मुले वाचली आणि नायक दाम्पत्याच्या दुहेरी खून प्रकरणाला वाचा फुटली होती.
मेरशी येथे शिवाजी नायक हा मजूर राहत होता. कंत्राटदार ओस्बान फर्नांडिस यांच्याकडे तो कामाला होता. काही कारणास्तव शिवाजी याला खांबाला बांधून जबर मारहाण करण्यात आली. त्यात शिवाजी नायक याचा मृत्यू झाला होता. संशयित ओस्बान याने मेरशी येथे पोकलीनच्या साहाय्याने एक खड्डा खोदून तेथे शिवाजीच्या मृतदेहाची विल्हेवाट लावली होती. मृत शिवाजी याची पत्नी सुजाता नवरा बेपत्ता असल्याची तक्रार नोंदविण्यासाठी ओल्ड गोवा पोलीस स्टेशनवर गेली होती. त्यानंतर सुजाता हिचा मृतदेह अनमोड घाटात आढळून आला होता. या प्रकरणी संशयित ओस्बान फर्नांडिस आणि रमेश बागवे यांच्या विरोधात बाल न्यायालयात आरोपपत्र दाखल करण्यात आले होते.
