सुकूर-पर्वरी येथे चिखलात दुचाकी घसरल्याने अपघात
म्हापसा ते पर्वरी या दरम्यानच्या राष्ट्रीय महामार्गावर सुकूर येथे काल सकाळी झालेल्या अपघातात दुचाकीवरील एका 28 वर्षीय तरुणाचा मृत्यू झाला, तर दुचाकीचालक गंभीर जखमी झाला. पर्वरीत सध्या उड्डाणपुलाचे काम सुरू असून, येथील चिखलमय झालेल्या रस्त्यावरून दुचाकी घसरल्यानंतर दुचाकीवर मागे बसलेला सनी नार्वेकर (रा. नानोडा-डिचोली) हा ट्रकच्या चाकाखाली सापडला आणि त्यातच त्याचा मृत्यू झाला. दरम्यान, अपघातानंतर ट्रकचालकाने पलायन केले. पोलीस त्याचा शोध घेत आहेत.
सविस्तर माहितीनुसार, गुरुवारी सकाळी 10 वाजण्याच्या सुमारास ही घटना घडली. सनी नार्वेकर आणि शुभम म्हावळींगकर हे दोघे पर्वरीहून म्हापशाकडे दुचाकीवरून (क्र. जीए-03-बीडी-2845) जात असताना सुकूर येथे पर्वरी जुना बाजार जंक्शनपासून काही अंतरावर ही दुर्दैवी घटना घडली. पर्वरी येथील उड्डाणपुलाचे बांधकाम आणि पावसामुळे हा महामार्ग चिखलमय झालेला आहे. याच चिखलातून जाताना त्यांची दुचाकी घसरली. त्याचवेळी मागून येणारा अवजड ट्रक दुचाकीवरून खाली पडलेल्या सनी नार्वेकरच्या अंगावरून गेल्याने त्याचा जागीच मृत्यू झाला.
या अपघातात दुचाकीचालक शुभम मावळींगकर हा गंभीर जखमी झाला असून, त्याला उपचारासाठी गोमेकॉमध्ये दाखल करण्यात आले आहे.
या अपघाताची माहिती मिळताच पर्वरी पोलीस निरीक्षक राहुल परब यांच्या नेतृत्वाखालील पथकाने घटनास्थळी धाव घेतली. अपघाताचा पंचनामा कॉन्स्टेबल श्रीपाद तेली यांनी केला. यानंतर मृतदेह शवचिकित्सेसाठी गोमेकॉत पाठवून दिला. शवचिकित्सेनंतर सनी नार्वेकर याचा मृतदेह नातेवाईकांच्या स्वाधीन करण्यात आला. अपघातानंतर फरार झालेल्या ट्रकचालकाचा पोलीस शोध घेत आहेत.
