>> मुख्यमंत्री सावंत यांनी दिली माहिती
राज्यातील जुवारी पुलाची एक लेन येत्या १९ डिसेंबरपर्यंत सुरू करण्याची विनंती केंद्रीय मंत्री नितीन गडकरी यांना करण्यात आली आहे, अशी माहिती काल मुख्यमंत्री डॉ. प्रमोद सावंत यांनी नवी दिल्लीच्या तीन दिवसीय दौर्‍यावरून परतल्यानंतर पत्रकारांशी बोलताना दिली.
सीआरझेडजवळील वाळू काढण्यास मान्यता देण्याची विनंती केंद्रीय पर्यावरणमंत्र्यांकडे करण्यात आली आहे. पश्‍चिम घाटातील संवेदनशील भागातील आणखी २६ गावे वगळण्याची मागणी करण्यात आली आहे, अशी माहिती मुख्यमंत्री डॉ. सावंत यांनी दिली.
पंतप्रधान नरेंद्र मोदी यांना राज्यातील लसीकरण व इतर उपक्रमाबाबत माहिती दिली. राज्यातील स्वयंपूर्ण गोवा मोहिमेत सहभागी सरपंच व इतरांना व्हॅर्चुअल पद्धतीने मार्गदर्शन करण्याची विनंती करण्यात आहे. पंतप्रधान मोदी यांनी मार्गदर्शन करण्याचे आश्‍वासन दिले आहे, असेही मुख्यमंत्री डॉ. सावंत यांनी सांगितले.
राज्यात धनगर-गवळी समाजाचा प्रश्‍न कित्येक वर्षे प्रलंबित आहे. केंद्रीय गृहमंत्री अमित शहा यांच्याशी या विषयावर चर्चा करण्यात आली आहे. हा प्रश्‍न तातडीने सोडविण्यासाठी आवश्यक उपाययोजना करण्याची मागणी करण्यात आली आहे, अशीही माहिती यावेळी मुख्यमंत्री डॉ. सावंत यांनी दिली.
