जम्मू-काश्मीरमधील नगरोटा येथील बान टोल नाक्याजवळ ट्रकमधून आलेल्या दहशतवाद्यांमध्ये व जवानांमध्ये झालेल्या चकमकीत चार दहशतवाद्यांचा खात्मा करण्यात आला. या दहशतवाद्यांकडून मोठ्याप्रमाणात शस्त्रसाठा हस्तगत करण्यात आला आहे. जम्मू-काश्मीरमधील डीडीसी निवडणुकीच्या पार्श्वभूमीवर मोठा दहशतवादी हल्ला घडवण्याचा त्यांचा कट असण्याची शक्यता जम्मू झोनचे आयजी मुकेश सिंह यांनी वर्तवली आहे. काल गुरूवारी पहाटे ५ वाजता जेव्हा वाहनांची नियमीत तपासणी सुरू होती. तेव्हा एका ट्रकला अडवण्यात आले. यानंतर ट्रक चालकास खाली उतरवल्यानंतर तो पसार झाला.
यानंतर ट्रकची तपासणी सुरू असताना, पोलीस व सीआरपीएफच्या जवानांवर दहशतवाद्यांकडून गोळीबार सुरू झाला. यानंतर जवानांकडून प्रत्युत्तर देण्यात आले. ही चकमक तीन तास सुरू होती. दहशतवाद्यांकडून मोठ्याप्रमाणावर जवानांवर गोळीबार केला गेला. ग्रेनेड फेकण्यात आले. ज्यामध्ये दोन पोलीस शिपाई जखमी झाले. तर, यावेळी जवानांनी चार दहशतवाद्यांना ठार केलं. यावेळी हस्तगत करण्यात आलेल्या शस्त्र साठ्यात ११ एके-४७ रायफल, तीन पिस्तुले, २९ ग्रेनेड, पिट्टू बॅग, कंपस, मोबाईलसह अन्य सामुग्रीचा समावेश होता.
