राम मंदिर दान चोरी प्रकरण; चंपत राय, अनिल मिश्रा यांनी पद सोडले; 8 जणांना अटक
अयोध्या राम मंदिर दान चोरी प्रकरणात मुख्यमंत्री योगी आदित्यनाथ यांनी घेतलेल्या अत्यंत आक्रमक आणि कडक भूमिकेनंतर, ‘श्री राम जन्मभूमी तीर्थक्षेत्र ट्रस्ट’मध्ये मोठे राजकीय आणि प्रशासकीय भूकंप झाले आहेत. या प्रकरणाचे गांभीर्य लक्षात घेता, ट्रस्टचे सरचिटणीस चंपत राय आणि विश्वस्त अनिल मिश्रा यांनी आपल्या पदांचे राजीनामे दिले आहेत. विशेष तपास पथकाच्या (एसआयटी) प्राथमिक अहवालात देणगी व्यवस्थापनातील गंभीर त्रुटी समोर आल्यानंतर ही मोठी कारवाई झाली आहे.
रामललाच्या चरणी भाविकांनी अर्पण केलेल्या कोट्यवधी रुपयांच्या देणगीच्या हाताळणीत आणि देखरेखीत मोठ्या प्रमाणावर निष्काळजीपणा झाल्याचे ‘एसआयटी’च्या प्राथमिक चौकशीत उघड झाले होते. हा अहवाल समोर येताच चंपत राय आणि अनिल मिश्रा यांनी आपले पद सोडले.
क्राईम ब्रँच आणि विशेष तपास पथकाने गुरुवारीच या प्रकरणी तसेच एफआयआर नोंदवत 8 जणांविरुद्ध गुन्हा देखील दाखल केला होता. त्यानंतर रात्री उशिरा त्या आठ जणांना अटक केली होती. यानंतर अवघ्या 24 तासांच्या आतच ट्रस्टच्या दोन बड्या नेत्यांनी राजीनामा दिल्यामुळे संपूर्ण देशातील राजकीय वर्तुळात खळबळ उडाली आहे.
पहिली एफआयआर दाखल
या संपूर्ण घोटाळ्याप्रकरणी एसआयटीच्या शिफारशीनुसार पहिली अधिकृत तक्रार दाखल करण्यात आली आहे. माजी विश्वस्त कामेश्वर चौपाल यांच्या निधनानंतर, सप्टेंबर 2025 मध्ये ट्रस्टमध्ये समाविष्ट झालेले नवीन सदस्य कृष्ण मोहन यांनी ही तक्रार नोंदवली आहे. या तक्रारीच्या आधारे आता तपासाची चक्रे अधिक वेगाने फिरू लागली आहेत.
नेमके प्रकरण काय?
देणगीत गैरव्यवहार : राम मंदिरात देशभरातून येणाऱ्या कोट्यवधी रुपयांच्या गुप्तदानामध्ये आणि ऑनलाईन देणग्यांमध्ये पारदर्शकता नसल्याचे आरोप झाले होते.
सुरक्षेत त्रुटी : एसआयटीच्या अहवालानुसार, देणगी गोळा करणे, तिची मोजणी करणे आणि ती बँकेत जमा करणे या संपूर्ण प्रक्रियेत गंभीर त्रुटी आणि हलगर्जीपणा आढळून आला.
अटकेची कारवाई : संशयास्पद व्यवहारांमुळे गुरुवारी रात्रीच काही कर्मचाऱ्यांना ताब्यात घेण्यात आले होते, ज्यानंतर राजीनाम्यांचे सत्र सुरू झाले.
