सपत्नीक गोव्यात परतलेल्या गुरुनाथ नाईक यांची काल भेट घेतली असता ते म्हणाले की, मला गोव्यात परतायचे होते. पण येथे माझे घर नसल्याने व घर खरेदी करण्याएवढे पैसे माझ्याकडे नसल्याने येथे आल्यास रहायचे कुठे हा प्रश्न होता. त्यामुळे ३ महिन्यांपूर्वी गोव्याचे मुख्यमंत्री मनोहर पर्रीकर यांची पर्वरी येथे त्यांच्या केबिनमध्ये जाऊन भेट घेतली होती. या भेटीत सरकारी घर उपलब्ध करून देण्याची विनंती त्यांच्याकडे केली होती.
पर्रीकर यांच्याबद्दल बरेच ऐकले होते आणि ते खरे असल्याचा प्रत्यय त्यांना भेटल्यानंतर आला. खूप चांगली वागणूक त्यांनी या भेटीच्या वेळी दिली. घर देण्याचे आश्वासनही दिले आणि शेवटी विनाविलंब घरही उपलब्ध करून दिले. गोवा सोडल्यानंतरच्या आपल्या ३० वर्षांच्या प्रवासाविषयी बोलताना गुरुनाथ नाईक म्हणाले की, १९८२ साली मी गोवा सोडला. गोव्यातून गेलो तो वसईला. ८५ सालापर्यंत वसईला राहून लेखन केले. नंतर ८५ साली लोकसत्ता दैनिकासाठी कायदा प्रतिनिधी म्हणून काम केले. नंतर ८७ साली औरंगाबादला गेलो. तेथे ८७ ते ८९ सालापर्यंत ‘अजिंठा’ या दैनिकात काम केले. ९० साली विलासराव देशमुख यांना लातूर येथे ‘एकमत’ दैनिक सुरू करायचे होते. त्यानी मला ऑफर दिली. मी या दैनिकाचा संपादक बनलो. पण पगार मिळायचा केवळ ४ हजार रुपये. नंतर वर्ष संपता संपता बीडला गेलो. तेथे ‘लोकआशा’ या दैनिकाचा संपादक बनलो. तेथे १३ हजार रु. पगार मिळायचा. तेथे कित्येक वर्ष संपादक म्हणून काम केले. मात्र, काही वर्षांपूर्वी मानेच्या रक्तवाहिनीत दोष निर्माण झाल्याने आजारी पडलो आणि नोकरी सोडावी लागली. त्यामुळे गेल्या काही वर्षांपासून गोव्यात येऊन स्थायिक होण्याचा विचार करीत होतो, पण योग काही जुळून येत नव्हता. शेवटी एका मित्राने गोव्याचे मुख्यमंत्री मनोहर पर्रीकर यांना भेटण्याची विनंती केली आणि ३ महिन्यांपूर्वी येऊन त्यांना भेटलो आणि गोव्यात येऊन स्थायिक होण्याची वाट मोकळी झाली.
