एका हिरव्यागार जंगलात सर्व प्राणी-पक्षी गुण्यागोविंदाने राहत होते. जंगलात नुकतेच नवीन वाचनालय, आरोग्य केंद्र आणि स्वच्छ पाण्याची व्यवस्था करण्यात आली होती. त्यामुळे सर्वांच्या जीवनात आनंद आणि समाधान वाढले होते.
एके दिवशी सिंह महाराज म्हणाले, आपण सर्वांनी मिळून जंगलाचा विकास केला आहे. आता या यशाचा आनंद साजरा करण्यासाठी एक आनंदमेळा भरवूया.
सर्वांनी आनंदाने होकार दिला. हत्तीदादांनी मोठे मैदान स्वच्छ केले. माकडदादांनी रंगीबेरंगी फुलांचे तोरण बांधले. मोराने सुंदर रांगोळ्या काढल्या. पोपट आणि साळुंकी यांनी पाहुण्यांचे स्वागत करण्याची जबाबदारी घेतली. खारुताईने फळांच्या टोपल्या सजवल्या, तर सशाने मुलांसाठी खेळांची तयारी केली.
मेजवानीत गरमागरम पुरी-भाजी, मसाला भात, पनीर, फळांचे सॅलड, लाडू, जिलबी, आईस्क्रीम आणि ताज्या फळांचा रस असा स्वादिष्ट बेत होता. सर्वांनी मनसोक्त जेवणाचा आस्वाद घेतला. जेवणानंतर अनेक मजेशीर खेळ झाले. दोरीखेच, संगीत खुर्ची, कोडी सोडवा आणि नृत्यस्पर्धा यांमध्ये सर्वांनी उत्साहाने भाग घेतला. विजेत्यांना सुंदर रोपे, गोष्टींची पुस्तके आणि रंगीत वही भेट म्हणून देण्यात आली. संध्याकाळी सर्वांनी शेकोटीभोवती बसून जुन्या आठवणी सांगितल्या, गाणी गायली आणि मनमोकळ्या गप्पा मारल्या. हसत-खेळत वातावरण अगदी आनंदमय झाले.
कार्यक्रमाच्या शेवटी सिंह महाराज म्हणाले, आपण नेहमी असेच एकत्र राहिलो, एकमेकांना मदत केली आणि आनंद वाटून घेतला तर आपले जंगल कायम सुखी राहील. सर्वांनी टाळ्यांच्या गजरात सिंह महाराजांचे आभार मानले आणि पुन्हा भेटण्याचे ठरवून आनंदाने आपल्या घरी परतले. खरा आनंद हा मित्रांसोबत वेळ घालवण्यात, एकमेकांना मदत करण्यात आणि प्रेमाने व एकोप्याने राहण्यात असतो.
- कु. साईराज कदम
शारदा उच्च माध्यमिक विद्यालय
भेंडाळे, वझरी
