राज्यातील मतदारयादीच्या विशेष सखोल पुनरावलोकनाअंतर्गत (एसआयआर) मतदारांना गणन अर्ज सादर करण्याची अंतिम मुदत काल पूर्ण झाली. येत्या 16 डिसेंबर रोजी मसुदा मतदारयादी जाहीर केली जाणार आहे. राज्यातील सुमारे एक लाख मतदारांना पडताळणीच्या वेळी वैध पुरावे सादर करावे लागणार आहे. वैध पुरावे सादर न केल्यास त्यांची नावे यादीतून वगळली जाऊ शकतात. तसेच, सुमारे 1.85 लाख मतदार मॅप केलेले नाहीत आणि निवडणूक नोंदणी अधिकाऱ्यांकडून अशा सर्व व्यक्तींना नोटिसा जारी केल्या जातील. या मतदारांना सुनावणीसाठी उपस्थित राहावे लागेल आणि यादीत त्यांची नावे कायम ठेवण्यासाठी साहाय्यक कागदपत्रे सादर करावी लागतील. पडताळणी आणि मॅपिंग प्रक्रिया पूर्ण झाल्यानंतर 16 डिसेंबर रोजी मसुदा मतदार यादी प्रकाशित केली जाईल, अशी माहिती निवडणूक कार्यालयातील अधिकाऱ्यांनी दिली.
