– श्रद्धानंद वळवईकर

किती वर्णावा तेंडुलकरी महिमा|

अडीच दशके तू विकेटवरी उभा॥

फटक्यांचा निर्माता तू| डावांचा सावरता॥

तंत्राचा अंतर्ज्ञानी तू| मेरूमणी महानतेचा॥

शतकांचा राजा तू| धावांचा महाराजा॥

विक्रमांचा अधिपती तू| क्रिकेटचा जगपती॥

विजयांचा महामेरू तू| प्रतिस्पर्ध्यांचा कर्दनकाळ॥

 हा तेंडुलकरी महिमा वर्णावा तरी किती? या महान खेळाडूवर स्तुतिसुमनांचा वर्षाव करावा तरी किती? प्रतिष्ठेचा पद्मविभूषण, भारतीय खेळ क्षेत्रातील सर्वोत्कृष्ट ‘खेलरत्न’, २०१० सालचा आयसीसीचा वर्षातील सर्वोत्तम क्रिकेटपटूसाठीचा सर गारफिल्ड सोबर्स पुरस्कार, २०१२ साली राज्यसभेच्या सदस्यपदी नियुक्ती आणि भारतीय सेनेतील ‘कर्नल’शी साम्य असलेल्या ग्रुप कॅप्टनपदी हवाई दलातर्फे निवड, तसेच २००१ साली विस्डेनकडून कसोटीत सर डॉन ब्रॅडमननंतरचा आणि वनडे क्रिकेटमध्ये सर व्हीव्हीएन रिचर्डस् यांच्यानंतरचा दुसरा सर्वश्रेष्ठ क्रिकेटपटू म्हणून गौरव. जागतिक क्रिकेट क्षेत्रात सचिनने प्राप्त केलेला हा ‘महागौरव’ या विक्रमादित्याला विद्यमान क्रिकेटपर्वातील एक महान क्रिकेटपटू बनवितो. विश्‍वविक्रमी क्रिकेट पर्वाची निर्मिती करूनही त्याने एक आदर्शवत आणि शिस्तबद्ध खेळाडू अशीच आपली प्रतिमा राखली. आपला तोल कधीही ढळू दिला नाही की यशाची धुंदी डोक्यात चढू दिली नाही. म्हणूनच तर ‘तेंडुलकरी महिमा वर्णावा किती’ असेच पुन्हा पुन्हा म्हणावेसे वाटते.