राज्यपाल पुसापती अशोक गजपती राजू यांनी गोवा मुक्ती दिनानिमित्त गोव्यातील जनतेला हार्दिक शुभेच्छा व्यक्त केल्या आहेत. गोवा मुक्ती दिनाच्या या ऐतिहासिक प्रसंगी राज्यपालांनी मोठी घोषणा केली आहे. त्यानुसार, गोव्यातील राजभवन हे आता ‘लोकभवन’ गोवा म्हणून ओळखले जाईल, असे राज्यपालांनी जाहीर केले. हा बदल वसाहतकालीन शब्दावलीपासून एक जाणीवपूर्वक आणि विचारपूर्वक पाऊल आहे. लोकभवन म्हणजे लोकांचे घर, जे पारदर्शकता, समावेशकता आणि गोव्यातील नागरिकांची सेवा करण्यासाठी आपल्या अढळ समर्पणाचे प्रतीक आहे. लोकभवन लोकांची सेवा करण्यासाठी वचनबद्धतेचे प्रतिनिधित्व करते, ती एक अशी संस्था आहे जिथे प्रत्येक नागरिकांच्या मनात आपलेपणाची भावना आहे. हे केवळ प्रशासकीय अधिकाराचे आसन नाही तर ते प्रत्येक गोमंतकीयांच्या आशा, अपेक्षा आणि विश्वासाचे स्थान आहे. लोकभवन खरोखरच लोकांसाठी, लोकांसोबत आणि लोकांच्या सेवेत काम करील, असे राज्यपालांनी या नामबदलाच्या पार्श्वभूमीवर म्हटले आहे.
मुख्यमंत्री डॉ. प्रमोद सावंत यांनी देखील गोवा मुक्ती दिनानिमित्त गोमंतकीयांना शुभेच्छा दिल्या आहेत.
