30 C
Panjim
Tuesday, June 22, 2021

चुकीचे पायंडे

निवडणुका जवळ आल्या की आश्वासनांची खैरात जनतेवर होत असते. या निवडणुकीसंदर्भातही हेच चित्र सध्या दिसते आहे. कॉंग्रेस पक्षाने नुकताच आपला जो जाहीरनामा प्रकाशित केला त्यामध्येही भर आहे तो अशा नानाविध सवलतींवर. त्यातील युवकांना पाच लीटर पेट्रोल देण्याची सवंग घोषणा लक्षवेधी ठरली आहे. महिलांच्या गृहआधारची रक्कम पाच हजार करणार, दारिद्य्ररेषेखालील सर्वांना मोफत वीज व पाणी देणार, बेरोजगारांना पाच हजारांचा भत्ता देणार वगैरे घोषणांची जाहीरनाम्यामध्ये भरमार आहे. भारतीय जनता पक्षाचा जाहीरनामाही अशाच प्रकारच्या घोषणांनी तुडूंब भरलेला असेल यात शंका नाही. अलीकडे राजकारणाची दिशाच अशी बदललेली आहे की अशा प्रकारच्या आर्थिक आमिखांखेरीज हवे तसे मतदार आपल्याकडे वळणार नाहीत या गंडाने ग्रासलेले राजकीय पक्ष आणि उमेदवार अशा प्रकारच्या चटकदार घोषणांचा समावेश आपल्या वचननाम्यात करीत असतात. राजकारणामध्ये व्यवस्था परिवर्तन करण्याची बात करणार्‍या आदमी पक्षानेदेखील गोव्यासाठी दिलेल्या आश्वासनांमध्ये सरकारच्या सर्व आर्थिक योजनांची रक्कम दुप्पट करायचा ठळकपणे समावेश केलेला आहे. दक्षिणेकडील राज्यांमध्ये ज्या प्रमाणे मोफत भेटवस्तू देण्याचे पेव फुटले आहे, तसे आता गोव्यातही व्हायला लागले तरीही आश्चर्य वाटायला नको. एकीकडे निवडणूक आयोग मतदान आमीषविरहित आणि स्वच्छ वातावरणात व्हावे अशी अपेक्षा करीत असताना दुसरीकडे पक्षांच्या जाहीरनाम्यांना अशा प्रकारे चंद्र तारे तोडून आणण्याची वचने देणारे स्वरूप येते हा दैवदुर्विलास म्हणावा लागेल. कॉंग्रेसची युवकांना पाच लीटर पेट्रोल देण्याची घोषणा हा अशा घोषणाबाजीच्या सवंगपणाचा नमुनाच म्हणावा लागेल. आधीच आपल्या गोव्यामध्ये अपघातांचे प्रमाण प्रचंड आहे. युवा पिढी हकनाक रस्तोरस्ती आपला जीव गमावते आहे. ‘मार्ग’ ह्या वाहतूक सुरक्षेसंदर्भात निष्ठेने काम करणार्‍या संस्थेने मध्यंतरी सर्व राजकीय पक्षांना रस्ता सुरक्षेसंबंधीच्या घोषणांचा अंतर्भाव जाहीरनाम्यांत करण्याचे ह्रद्य आवाहन केले होते, परंतु ते करणे तर दूरच, उलट सत्तेवर आल्यास युवकांना दरमहा मोफत पेट्रोल देण्याचे वचन देणे म्हणजे रस्त्यावरच्या धूम शैलीच्या धटिंगणशाहीलाच प्रोत्साहन देण्यासारखे नाही काय? गेल्या विधानसभा निवडणुकीत भाजपाने पेट्रोलवरील मूल्यवर्धित कर हटविण्याचे आश्वासन दिले होते, ती कदाचित ह्या निर्णयाची प्रेरणा असू शकेल, परंतु अशा प्रकारच्या घोषणा लोकप्रिय ठरत असल्या तरी त्यात लोकहित किती सामावले आहे याचा विचारही व्हायला हवा. सरकारने लागू केलेल्या युवा संवाद योजनेचे स्वरूपही असेच आहे. तरुणांना मोफत इंटरनेट डेटा आणि टॉकटाइम आणि तोही बीएसएनएलसारख्या सरकारी सेवेमार्फत न देता एका खासगी मोबाईल कंपनीच्या मार्फत देण्यात आला आहे. या इंटरनेटचा वापर ज्ञानसंपादनासाठी किती आणि सोशल मीडियावर पडीक राहण्यासाठी किती हे कोण तपासणार? त्यामुळे सत्तेवर येण्यासाठी मतदारांना आकृष्ट करण्यासाठी घोषणाबाजी करीत असताना त्यात खरोखर लोकहित सामावलेले आहे का याचा प्रांजळपणे विचार सर्वच राजकीय पक्षांनी करणे गरजेचे आहे. सरकारे येतात नि जातात, परंतु अशा घोषणांमुळे जे पायंडे पडतात, ते हटवणे मग इतरांनाही शक्य होत नाही. आर्थिक खिरापतींची जी चटक आज समाजाला लागली आहे, त्यातून मिंधेपणाची संस्कृती तर उदयाला येतेच, पण कार्यसंस्कृतीलाही हे ऐतखाऊपण मारक ठरते आहे. सत्तेसाठी असे शॉर्टकट अवलंबण्याऐवजी सातत्यपूर्ण सामाजिक कार्याची संस्कृती जोवर रुजणार नाही, तोवर जाहीरनाम्यांमधून अशा सवंग घोषणा होतच राहतील!

STAY CONNECTED

847FansLike
8,000SubscribersSubscribe

TOP STORIES TODAY

उत्तम आरोग्यासाठी योगासने

डॉ. मनाली म. पवार ‘पादांगुष्ठासन’ हे पोटाची जादा चरबी कमी करण्यासाठी, मान दुखत असल्यास त्याचा त्रास कमी करण्यासाठी,...

व्हिटिलिगो किंवा कोड

डॉ. अनुपमा कुडचडकरपणजी कोडामुळे व्यक्तीच्या शरीराच्या आतील भागात काही उपद्रव होत नसून फक्त बाह्य सौंदर्यात विद्रुपता येते ज्यामुळे...

इफ्‌स अँड बट्‌स! बायोस्कोप

प्रा. रमेश सप्रे ‘इफ्‌स अँड बट्‌स’नी आपलं दैनंदिन जीवन, संभाषण ओतप्रोत भरलेलं असतं. अनेकवेळा ‘इफ्‌स अँड बट्‌स’ यांनी...

विरोधक एकत्र येणार?

‘जो मै बोलता हूँ, वो मै करता हूँ, जो मै नही बोलता वो तो डेफिनेटली करता हूँ’ हा हिंदी चित्रपटातील संवाद ज्यांना...

कोरोना बळी ३ हजाराच्या उंबरठ्यावर

>> राज्यातील सक्रिय कोरोनाबाधितांची संख्याही ३ हजारांवर; नवे केवळ २१७ रुग्ण; ७ जणांचा बळी राज्यातील सक्रिय रुग्णांची संख्या ३...

ALSO IN THIS SECTION

विरोधक एकत्र येणार?

‘जो मै बोलता हूँ, वो मै करता हूँ, जो मै नही बोलता वो तो डेफिनेटली करता हूँ’ हा हिंदी चित्रपटातील संवाद ज्यांना...

स्वातंत्र्याचा हुंकार!

बरोबर ७५ वर्षांपूर्वी आजच्याच दिवशी संध्याकाळी ठीक चार वाजता ह्या गोमंतकामध्ये एक चमत्कार घडला. एक अशी गोष्ट घडली जी कोणी कधी पाहिली...

कॉंग्रेसी सुंदोपसुंदी

कॉंग्रेस पक्षाचे गोवा प्रभारी दिनेश गुंडुराव आज गोवा दौर्‍यावर येत आहेत. राज्य विधानसभेची निवडणूक आता आठ महिन्यांवर आली असल्याने कॉंग्रेस पक्षाला त्यासाठी...

विझलेला चिराग

राजकारण हे कोणत्या थराला जाऊ शकते आणि रक्ताच्या नात्यावरही कसे मात करू शकते त्याचा दाहक प्रत्यय सध्या स्व. रामविलास पास्वान यांचे चिरंजीव...

‘आप’चे आगमन

पुढील वर्षी होणार्‍या गोवा विधानसभा निवडणुकीमध्ये सर्वच्या सर्व चाळीसही मतदारसंघांमध्ये आपले उमेदवार उभे करणार असल्याची घोषणा आम आदमी पक्षाच्या राज्य संयोजकांनी केली...