केरळच्या मुख्यमंत्रिपदाचा पेच अखेर दहा दिवसांनी सुटला आहे. काँग्रेसच्या नेत्यांनी केरळहून दिल्लीला वारंवार ये-जा करत आणि एका आठवड्याहून अधिक काळ चाललेल्या सखोल विचारमंथनानंतर व्ही. डी. सतीशन यांची केरळ काँग्रेसच्या विधिमंडळ पक्षाचे नेते म्हणून गुरुवारी घोषणा केली. त्यामुळे केरळचे पुढील मुख्यमंत्री व्ही. डी. सतीशन असतील, हे स्पष्ट झाले आहे.
मुख्यमंत्रिपदासाठी पक्षाच्या शीर्ष नेत्यांमध्ये सुरु असलेल्या अंतर्गत चढाओढीमुळे निर्माण झालेल्या अनेक दिवसांच्या चर्चांना यामुळे पूर्णविराम मिळाला आहे. काँग्रेसचे सरचिटणीस के. सी. वेणुगोपाल आणि ज्येष्ठ नेते रमेश चेन्निथला हे देखील केरळच्या सर्वोच्च पदाच्या शर्यतीत असलेले अन्य नेते होते.
केरळ विधानसभा निवडणुकीत यूडीएफला विजय मिळण्यापूर्वी काँग्रेस नेते व्ही. डी. सतीशन यांनी केरळ विधानसभेत विरोधी पक्षनेते म्हणून काम पाहिले होते. 140 सदस्यांच्या या विधानसभेत यूडीएफ आघाडीने 102 जागांवर विजय मिळवला. व्ही. डी. सतीशन यांनी 2026 ची केरळ विधानसभेची निवडणूक परावूर मतदारसंघातून जिंकली आणि सलग सहाव्यांदा आमदार म्हणून विजय मिळवला.
